logo Nuacht Anois

 

Abair Amhrán!

Dé Céadaoin, an 9ú Meán Fómhair 2026


Ar thug tú cuairt ar Fhleadh Cheoil na hÉireann i mBéal Feirste le linn an tsamhraidh? Tháinig amuigh is istigh ar 1.6 milliún cuairteoir chuig an fhleadh i rith na chéad seachtaine de mhí Lúnasa. Ní nach ionadh go raibh sráideanna na cathrach plódaithe i rith na féile sin! 


Mura raibh deis agat féin teacht go Béal Feirste, gach seans go bhfaca tú rud éigin faoin fhleadh ar an teilifís. (Bhí go leor clár faoin cheol agus faoi na ceoltóirí ag an fhleadh le feiceáil ar an teilifís, chomh maith le físeáin eile a bhí le sonrú ar na meáin shóisialta.)


Rud amháin a bhí ina díol spéise le linn na fleidhe ná an méid daoine óga a bhí ag buscáil ar shráideanna Bhéal Feirste. Bhí cuid den mhuintir óga ag seinm ar uirlisí ceoil, bhí cuid eile ag damhsa agus bhí cuid eile arís ag canadh. 


Beidh Fleadh Cheoil na hÉireann ag teacht ar ais go Béal Feirste an samhradh seo chugainn. Má tá suim agat i gcúrsaí ceoil, b’fhéidir gur mhaith leat féin páirt a ghlacadh ann? Ná bí buartha mura bhfuil ceol uirlise ná damhsa Gaelach agat, is féidir i gcónaí amhrán a rá. 





 


Agus tá suíomh idirlín nua ann más suim leat bheith ag cleachtadh ar amhráin Ghaeilge - ABAIR AMHRÁN. Tá moll mór amhrán ar an suíomh seo. Is féidir éisteacht leis na hamhráin agus amharc ar na focail ag an am céanna. Seo ceann beag deas simplí le triail a bhaint as, ar dtús: Báidín Fheidhlimidh. Abair leat!  



Ceisteanna

  1. Cad é an t-ainm a bhí ar an fhéile cheoil a bhí ar siúl i mBéal Feirste an mhí seo caite?
  2. Cá mhéad cuairteoir a tháinig chuig an fhéile sa chéad seachtain de mhí Lúnasa?
  3. Má bhí an fhleadh rófhada ar shiúl uait, cén áit eile a dtiocfadh leat bheith ag amharc ar an cheol agus ar na ceoltóirí?
  4. Luaigh trí rud a bhí á ndéanamh ag na daoine óga ar shráideanna Bhéal Feirste.
  5. Cad é is féidir leat a dhéanamh ar an suíomh idirlín 'Abair Amhrán' chomh maith le héisteacht leis an cheol?


Le plé nó le déanamh

  • Plé sa Rang: Bhí na daoine óga ag “buscáil”. Ar mhaith leat féin dul ag buscáil? Cén uirlis cheoil a sheinnfeá, nó cén t-amhrán a chanfá dá mbeifeá á dhéanamh sin?
  • Cruthaitheacht: Samhlaigh go bhfuil tú ag cur tús le do 'Fhleadh Cheoil' féin sa scoil. Cén t-ainm a chuirfeá air? Cén cineál ceoil nó damhsa a bheadh le feiceáil ann?
  • Taighde: Téigh chuig an suíomh Abair Amhrán (le cead ó do mhúinteoir/tuismitheoir). Roghnaigh amhrán amháin, éist leis, agus scríobh síos dhá fhocal nua a d’fhoghlaim tú as.
  • Samhlaíocht agus Scéalaíocht: Samhlaigh go raibh tú féin ag buscáil ar na sráideanna nuair a bhí Fleadh Cheoil na hÉireann ar siúl i mBéal Feirste i mbliana. Scríobh scéal gairid nó tarraing pictiúr agus inis don rang faoin taithí a bhí agat ar an lá sin. (Cad é a bhí le feiceáil agus le cloisteáil agat? Cad é a bhí ag tarlú thart ort? Cad é mar a mhothaigh tú?)

meas