logo Nuacht Anois

 

An Scoil

Déardaoin, an 17ú Meán Fómhair, 2026

Bhuel, a chairde, tá muid anois leath bealaigh tríd mhí Mheán Fómhair. Cad é mar atá sibh ag socrú isteach in bhur gcuid ranganna nua? (Nó, b’fhéidir go bhfuil cuid agaibh ag socrú isteach i scoileanna nua fosta?)


An bhfuil múinteoir nua agat i mbliana? An fear é do mhúinteoir, nó an bean í? Cad é mar a thagann tú chun na scoile? Cá mhéad dalta atá i do rang? Cad é an t-ábhar scoile is fearr leat? Cad é a bhíonn i do mhála scoile agat gach lá? Cad é a bhíonn á dhéanamh agat ag am sosa agus ag am lóin? Tá mé cinnte de gur chuir do theaghlach go leor ceisteanna ort le seachtain nó dhó anuas faoin scoil. 


In áit a bheith ag smaoineamh ar fhreagraí ar an toirt ar na ceisteanna seo a chuirtear ort go randamach, cad faoi phóstaer nó leabhrán a chruthú ina léiríonn tú freagra ar gach ceist a chuireann daoine fásta ort faoin scoil. Is féidir leabhrán beag ina bhfuil 8 leathanach a chruthú amach as aon leathanach A4 ar an dóigh seo:


Anois, má tá do leabhrán beag féin cruthaithe agat, níl le déanamh agat ach na leathanaigh a líonadh le heolas faoi do shaol scoile. Scríobh “An Scoil” mar theideal ar an chéad leathanach agus tarraing pictiúr de do scoil (nó de lógó do scoile, b’fhéidir.)

(lógó scoile)

Ina dhiaidh sin, cuir teidil ar na leathanaigh eile. Smaoinigh ar na ceisteanna a chuirtear ort faoin scoil. B’fhéidir go mbeadh cuid de na teidil seo ina gcuidiú agat:

  • Cad é mar a thagaim chun na scoile?
  • Mo mhála scoile
  • An Seomra Ranga, 
  • Mo mhúinteoir, 
  • Mo rang, 
  • Am sosa, 
  • Am lóin, 
  • an tÁbhar is Fearr liom, agus
  • An Rud is Fearr liom faoin scoil,

Scríobh giota eolais ar gach leathanach agus tarraing pictiúr beag leis an eolas sin a léiriú.


Ar ndóigh, ní gá an tasc seo a dhéanamh ar pháipéar. Thiocfadh leat taispeántas a dhéanamh ar ríomhaire nó táibléad fosta. Is fútsa an rogha. 

(íomhá cruthaithe trí Adobe Express for Education - Dear bábóg aicsin chartún)


Ceisteanna

  1. Cén mhí den bhliain atá luaite sa téacs?
  2. Cá mhéad leathanach atá sa leabhrán beag a dhéantar as leathanach A4 amháin?
  3. Cén teideal ba chóir a scríobh ar an chéad leathanach den leabhrán?
  4. Cad é atá le tarraingt ar gach leathanach le taobh an eolais?
  5. Cad iad na gléasanna eile ar féidir an obair seo a thaispeáint orthu seachas páipéar?


Le plé nó le déanamh

  • Agallamh: Sula ndéanann na daltaí na leabhair a chruthú, iarr orthu na ceisteanna atá sa téacs a chur ar a chéile agus smaoineamh ar a gcuid freagraí sula gcuireann siad peann le páipéar.
  • Cruthaitheacht: An bhfuil lógó agus mana ag do scoil? Iarr ar na daltaí an mana agus an lógó a phlé. Cad é atá maith faoin lógó nó mana? An féidir leo leasuithe a mholadh, nó mana nua a chumadh? 
  • Scileanna Digiteacha: Má úsáideann na daltaí ríomhaire nó táibléad leis an tasc seo a dhéanamh, is féidir leo rogha de bhogearraí a úsáid (Sleamhnáin Google, Powerpoint, Just2Easy, Adobe Express for Education, srl.). Iarr ar na daltaí a nglór féin a thaifeadadh, ag léamh an téacs a scríobhann siad ar gach leathanach. 
  • Measúnú Piaraí: Leag amach na leabhráin chríochnaithe agus taispeáin na leaganacha digiteacha nó clóbhuail amach iad. Iarr ar na daltaí amharc orthu agus moladh dearfach a thabhairt dá chéile faoina gcuid iarrachtaí.

meas