Cá háit a bhfuil tú ag iarraidh dul?
An maith leat an eolaíocht? Cuidíonn an eolaíocht linn a thuiscint cén dóigh a mbíonn rudaí ag athrú sa saol thart timpeall orainn. Ach, an raibh a fhios agat go dtig leat rudaí a athrú tú féin? Níl le déanamh agat ach úsáid a bhaint as an eolaíocht.
Mar shampla, is féidir bolcán beag a chruthú sa bhaile, ag úsáid na heolaíochta. Rud a bheas spraíúil - a fhad is go n-iarrann tú cead roimh ré! (Níor mhaith leat prácás a dhéanamh sa teach!)
Leis an turgnamh seo a dhéanamh, caithfidh tú Sóid Aráin agus Fínéagar a mheascadh le chéile i gcupán. Ach, ar dtús, cuir síos tráidire leis an tábla nó an t-urlár a choinneáil glan. Tá Gallúnach de dhíth ort fosta le go mbeidh an pléascadh níos soiléire.
(Seo iad na rudaí atá de dhith ort.)
Is í an chéim is tábhachtaí ná an Fínéagar a chur leis an tSóid Aráin go gasta. Nuair a bhuaileann an dá ábhar seo lena chéile, tarlaíonn Imoibriú Ceimiceach.
Is ionann imoibriú ceimiceach agus an rud a tharlaíonn nuair a mheascann 2 (nó níos mó) ábhar lena chéile le rud éigin iomlán nua a chruthú. Sa chas seo, cruthaítear trí rud nua: uisce, salann, agus an-chuid gáis (Dé-ocsaíd charbóin).
Is é an gás seo (an gás céanna a bhíonn i ndeochanna súilíneacha) an rún taobh thiar den turgnamh. Brúnn an gás amach as an chupán go gasta, agus seo an rud a chruthaíonn an mionphléascadh. Ceapann an ghallúnach cuid den ghás sna boilgeoga (ach ab é sin, ní bheimis ábalta an gás a fheiceáil.)
(Bíonn salann fágtha sa chupán ag an deireadh.)
Le plé nó le déanamh
🧪 Bain triail as an turgnamh beag seo tú fein - ach IARR CEAD ar dtús!
🧪Tá físeán a léiríonn an turgnamh seo agus níos mó eolais faoin imoibriú ceimiceach, chomh maith le smaointe do thurgnaimh eile le fáil san fhillteán fíricí seo.
Ceisteanna
Leathanach baile!
Leathanach baile nuachta
Léigh leabhar
Folláine
Faigh cúnamh
