Cá háit a bhfuil tú ag iarraidh dul?
Inniu, ar fud an domhain, tá múinteoirí agus daltaí ag glacadh páirt i Lá an tSeomra Ranga Taobh Amuigh. Ar an lá seo, moltar do mhúinteoirí ceachtanna a dhéanamh taobh amuigh d’fhoirgneamh na scoile. Tugann seo deis do dhaltaí aer úr a fháil agus a bheith ag foghlaim faoin nádúr. Moltar a bheith ag súgradh taobh amuigh i rith an lae seo chomh maith. In amanna, cuirtear ainm eile ar an lá seo - Lá na Seomraí Ranga Folmha!
(pic le Evgeny Atamanenko/Shutterstock.com)
Cuireadh tús leis an lá seo i Londain in 2012. Le fírinne, bíonn dhá lá ann gach bliain chun ceiliúradh a dhéanamh ar an Seomra Ranga Taobh Amuigh. Tarlaíonn sin sa dóigh is go mbeidh scoileanna ar fud an domhain ábalta páirt a ghlacadh san fheachtas seo. I mbliana, beidh an t-imeacht seo ag tarlú inniu, agus arís ar an dara lá de mhí na Samhna. Mura mbeadh ach dáta amháin i gceist, is mó an seans go gcaillfeadh scoileanna amach air, mar gheall ar laethanta saoire difriúla, nó imeachtaí eile ag tarlú le linn an téarma s’acu.
(pic le Iryna Inshyna/Shutterstock.com)
Ach, cad chuige ar cuireadh tús leis an lá seo? Bhuel, deir na saineolaithe go bhfuil sé níos fearr dár sláinte am a chaitheamh taobh amuigh, in ionad taobh istigh an t-am ar fad.
(pic le Oksana Shufrych/shutterstock.com)
Deir na saineolaithe fosta, gur fearr an tuiscint a bhíonn againn ar thopaicí cosúil leis an nádúr, má bhímid ag foghlaim fúthu go praiticiúil taobh amuigh, in áit bheith ag amharc ar phictiúir i leabhair nó ar scáileán. Tugann an fhoghlaim taobh amuigh deis dúinn scileanna tábhachtacha a chleachtadh agus a fheabhsú, scileanna cosúil leis an chomhoibriú, an fhiosracht agus an chruthaitheacht.
(pic le Evgeny Atamanenko/Shutterstock.com)
Cad chuige nach mbainfimis triail as mar sin? Amach linn faoin aer!
Le plé agus le déanamh
An mbíonn ceachtanna taobh amuigh agat i do scoil? Cad é a dhéanann sibh taobh amuigh i rith an lae scoile?
Cad iad na ceachtanna a bhíonn agaibh taobh istigh den seomra ranga, de ghnáth, a bheadh fóirsteanach le déanamh taobh amuigh, dar leat?
Cad iad na rudaí ar mhaith leat foghlaim fúthu taobh amuigh?
Cad iad na buntáistí agus míbhuntáistí, dar leat, atá le ceachtanna a bheith taobh amuigh ar an scoil s’agat?
An dóigh leat go bhfuil sé níos éasca, nó níos deacra, ceachtanna taobh amuigh a dhéanamh i gcuid tíortha eile i gcomparáid le hÉirinn? Cad chuige sin, i do bharúil?
Bhí múinteoirí buartha nach raibh eolas ar bith ag na daltaí i Londain ar an nádúr. Mar sin, cheap siad an smaoineamh den seomra ranga taobh amuigh. An síleann tú go bhfuil tú féin eolach ar an nádúr?
Leathanach baile!
Leathanach baile nuachta
Léigh leabhar
Folláine
Faigh cuidiú